Garoowe, Ogoosto, 07, 2019: Madaxweyne ku-xigeenka dowladda Puntland Mudane Axmed Cilmi Cismaan Karaash ayaa magaalada Garoowe ka daahfuray Asbuuca Naas-nuujinta Adduunka, si wacyigalinta iyo faa’iidada Naas-nuujinta loo gaarsiiyo gobolada kala duwan ee Puntland.
Wasaaradda Caafimaadka Dowladda Puntland ayaa barnaamijkan soo diyaarisay, waxaana Madaxweyne ku-xigeenka ku wehlinaayey Wasiirka Caafimaadka Puntland Dr. Jaamac Faarax , masuuliyiin ka tirsan Wasaaradda, Ururada Haweenka iyo qaybaha kala duwan ee bulshada.
Madaxweyne Ku-xigeenka dowladda Puntland Mudane Axmed Cilmi Cismaan Karaash oo daahfuray Asbuucaan Naas-nuujinta ayaa sheegay in faa’iido ballaaran caruurta ay u leeyihiin naaska oo la nuujiyo, taas oo uu tilmaamay caafimaad ahaan inay tahay wax wanaagsan.
Sidoo kale Madaxweyne ku-xigeenka ayaa Madaxda Wasaaradda Caafimaadka Puntland iyo Saraakiisha Caafimaadkaba faray inay wacyigalinta gaarsiiyaan dhammaan gobolada Puntland, isla markaana hooyooyinka la dareensiiyo faa’iidada laga helayo caruurta oo naaska ay siiyaan.
-DHAMMAAD-
XAFIISKA WARFAAFINTAMADAXTOOYADA DOWLADDA PUNTLAND
